У канчатковым сваім выглядзе, набор Беларускіх шахмат "Шляхетны выбар" уяўляе высокамастацкі твор ручной работы з каштоўных парод драўніны, скуры і белай гліны, варты прыватных калекцый і збораў.
Дрэва. Каб задума ўдалася, спатрэбілася каля васьмі гадоў пастаянных эксперыментаў з формай, вобразам і тэхналогіямі. Дошка-шахматніца вырастала і паніжалася ў паверхах, куфэрак удасканальваўся і набываў свае барочныя абрысы. Увесь гэты час над іх выглядам працаваў майстар па дрэве - Яўген Рыдзеўскі.
Менавіта ён прыдумаў выкарыстоўваць у аздабленні Трона інкрустацыю з моранага дуба, а таксама канструкцыю куфэрка, у якім захоўваюцца фігуры. Але перш, чым інкруставаць Трон, Яўген бярэцца за падбор дрэва для шахматніцы. У розных варыянтах "Шляхетнага выбару" яна можа складацца як з дуба для белых клетак і моранага дуба для чорных, так і з ясеня для белых і звычайнага дуба для чорных.
Пасля падбору дрэва, ідзе складаны працэс падрыхтоўкі матэрыяла, наразанне яго на квадраты і склейка палоскамі ў адмыслова прыдуманым механізме. Пасля паслоскі склейваюцца паміж сабою ў дошку.
Агонь. Наступны, пасля вырабу асновы дошак, этап - лазернае выпальванне трона, у выглядзе традыцыйнай беларускай зоркі, а таксама нумароў і літар па контуру. Трон пасля будзе інкруставаны мораным дубам, дрэвам, якое праляжала тысячу гадоў у балоце, набыўшы характэрны чорны колер і здабыўшы трываласць каменю. На сёння вядомыя тысячагадовыя прадметы мастацтва з моранага дубу, якія выглядаюць нібы новыя - такая ў гэтага матэрыяла моц.
Дадаткова на вечцы выпальваецца лагатып гульні, прымерваецца і выпальваецца месца размяшчэння аўтараў-майстроў, назва і малюнак князёў на адваротным баку куфэрку. Увесь працэс кіруецца кампутарам, таму пры выпальванні магчыма ўносіць змены, каб дасягнуць патрэбнага рэзультату.
Гліна. Паралельна з работай над шахматніцай і куфэркам ствараюцца фігуры. Вобраз кожнай з іх распрацаваны мастаком-скульптарам і ўлічвае не толькі знешні выгляд, які адпавядае выгляду войскаў ВКЛ і Тэўтонскага ордэну, але і прадугледжвае лёгкую пазнавальнасць на дошцы: Князя з Ратнікам пераблытаць дакладна немагчыма.
Скульптар Міхал Латышаў зрабіў адзінкавыя экземпляры кожнай фігуры, пасля чаго з іх былі зробленыя слепкі і створаныя формы для адліўкі з белай гліны. Саму адліўку і далейшае давядзенне фігур да дасканаласці ажыццяўляюць мастакі дэкаратыўнага мастацтва Таццяна Рублеўская і Алег Школа.
Пасля нанясення дэталяў на фігуры і іх абпальвання, за справу бярэцца Таццяна Рублеўская - надаючы кожнаму набору свой колер і адценні. Дзякуючы ручной працы ўсе наборы адрозніваюцца адзін ад аднаго - у адным куфэрак можа быць светлым, а фігуры пад колер звычайнай гліны і вугалю, у другім - цёмны куфэрак, і фігуры колеру слановай косткі і бронзы.
Скура. Далей дошку і фігуры чакаюць пакрыццё лакамі і марылкамі, для большай трываласці і эстэтыкі. Асобным крокам ідзе наклейванне на донцы фігур і ножкі куфэрку сапраўднай скуры, для прыемнага тактыльнага адчування перасоўвання Князя да свайго Трона.
Дадаткова ў кожны набор ўкладаецца папяровыя правілы гульні, а сам куфэрак пакуецца ў спецыяльна распрацаваную кардонную скрыню. Нават у кардоне набор выклікае адчуванні высакароднасці і цалкам адпавядае сваёй назве "Шляхетнага выбару".
У камплект "Шляхетнага" набору Беларускіх шахмат уваходзяць:
- куфэрак і шахматніца з каштоўных пародаў драўніны;
- набор керамічных фігураў;
- правілы гульні;
- дызайнерская ўпакоўка для зручнага транспартавання.
Гульня распрацоўвалася 10 год, ставячы мэту ўзнавіць палітычныя і вайсковыя традыцыі Беларусі і ўсёй Усходняй Еўропы. Вынік - Беларуска-літвінскія шахматы альбо проста Беларускія шахматы - новы глыток нашых інтэлектуальных гульняў, прэзентаваны ў трох выглядах - падарункавы набор, шляхетны набор і кампутарная версія.
То чаго ж чакаць? Займіце Трон ужо цяпер!